Azərbaycan Müdafiə Nazirliyinin Hərbi Muzeyində "Dədə Qorqud" Milli Fondu və "Azərbaycan Dünyası" beynəlxalq jurnalının Sovet İttifaqı Qəhramanı, məşhur Azərbaycan tarixçisi, görkəmli elm xadimi, akademik Ziya Bünyadovu ölümündən sonra "Vətən Övladı" ordeni ilə təltif etməsi münasibətilə mərasim keçirilmişdir.
Trend-in məlumatına görə, "Vətən Övladı" qızıl ordeninə cəmiyyətin ən yaxşı nümayəndələri layiq görülürlər. Müxtəlif illərdə bu ordenlə Azərbaycan, Rusiya, Ukrayna, Moldova, Qazaxıstan, Qırğızıstan, Türkmənistan və başqa ölkələrin elm və mədəniyyət xadimləri, siyasətçilər biznes nümayəndələri təltif olunmuşlar.
Bu mükafat Ziya Bünyadova türk dünyası qarşısında xidmətlərinə və tariximizin tədqiqi sahəsində qazandığı nailiyyətlərə görə verilmişdir.
"Vətən Övladı" ordeni mərhum tarixçinin həyat yoldaşı Tahirə Bünyadovaya təqdim olunmuşdur. Tahirə xanım mükafata və həyat yoldaşının fəaliyyətinə yüksək qiymət verilməsinə görə Fondun prezidenti Eldar İsmayılova, Ağsaqqallar Şurasına və "Azərbaycan Dünyası" Beynəlxalq jurnalının kollektivinə təşəkkür etmişdir.