Dekabrın 23-də Bakı Dövlət Universitetində əməkdar elm xadimi, əməkdar mədəniyyət işçisi universitetin kafedra müdiri, "Şöhrət" ordenli, professor Abuzər Xələfovun anadan olmasının 80, elmi-pedaqoji fəaliyyətinin 60 illiyi münasibətilə tədbir keçirilmişdir.
Təhsil naziri Misir Mərdanov alimin Azərbaycanda kitabxanaşünaslıq elminin təşəkkül tapmasında, inkişaf etdirilməsi istiqamətində yorulmaz fəaliyyətindən danışmışdır. Alimin Azərbaycanda kitabxanaşünaslığın inkişafına verdiyi töhfələrdən söz açan təhsil naziri onun əməyinin dövlət tərəfindən layiqincə qiymətləndirildiyini demişdir.
BDU-nun rektoru, Milli Məclisin deputatı, akademik Abel Məhərrəmov vurğulamışdır ki, Abuzər Xələfov Azərbaycanda milli kitabxanaşünaslıq elmi məktəbinin yaradıcısı olmaqla yanaşı, onun milli koloritlərini zənginləşdirərək beynəlxalq nüfuzunu yüksəltmişdir.
Tədbirdə digər çıxış edənlər professorun elmi fəaliyyətindən geniş söhbət açmışlar.

AzərTAc