Azərbaycanın Hindistandakı səfiri İbrahim Hacıyev bu ölkənin "Press Trust of İndia" xəbər agentliyinin baş redaktoru M.K.Razdan ilə görüşmüşdür. 
İ.Hacıyev Azərbaycan ilə Hindistan arasında əlaqələr, son illərdə ölkəmizdə gedən sürətli iqtisadi inkişaf prosesləri, dövri mətbuatın vəziyyəti, eləcə də Azərbaycan Dövlət Teleqraf Agentliyi (AzərTAc) haqqında M.K.Razdana ətraflı məlumat vermişdir.
Diplomat AzərTAc ilə "Press Trust of İndia" agentliyi arasında əməkdaşlığa dair saziş layihəsinin vəziyyəti ilə maraqlanmışdır.
M.K.Razdan "Press Trust of İndia"nın tarixi və fəaliyyəti haqqında məlumat verərək bildirmişdir ki, agentliyin ölkə daxilində 60, xaricdə isə 20 nümayəndəliyi fəaliyyət göstərir.
AzərTAc ilə əməkdaşlıqda maraqlı olduqlarını vurğulayan M.K.Razdan saziş layihəsinə rəy və təkliflərini təqdim etmişdir. O, eyni zamanda, sənədlərin Bakı və Dehlidə mərhələli şəkildə imzalanaraq diplomatik kanallarla mübadiləsi imkanlarına baxılması təklifini də irəli sürmüşdür.
Saziş layihəsinin tezliklə razılaşdırılaraq imzalanmasının vacibliyini vurğulayan M.K.Razdan AzərTAc-ın baş direktoru Aslan Aslanovu Hindistana səfərə dəvət etmişdir.
Sonda M.K.Razdana "İrs" jurnalı və Azərbaycan müsiqilərindən ibarət CD-lər təqdim olunmuşdur.
AzərTAc