"2011-ci ildə Quba rayonunun Güləzi kəndində baş verən torpaq sürüşməsi ilə əlaqədar əhalinin köçürülməsi məqsədilə rayonun Aşağı Atuc kəndi yaxınlığında birinci mərhələ üzrə 189 fərdi yaşayış evinin tikintisi başa çatdırılıb".
APA-nın xəbərinə görə, bu barədə fövqəladə hallar naziri Kəmaləddin Heydərov məlumat verib.
O bildirib ki, torpaq sürüşməsi nəticəsində qəzalı vəziyyətə düşmüş evlərin əvəzinə Şamaxıda 30, Xaçmazda 26, Qusarda 16, Abşeron, Ağsu, Astara, Lerik, Tovuz rayonlarında ümumilikdə 116 evin tikintisinə başlanmışdır: "Bundan başqa, müxtəlif səbəblərdən uçmuş çoxmənzilli yaşayış binaları əvəzinə Bakı şəhəri, Bəsti Bağırova küçəsində 18 mərtəbəli, Rəsulzadə küçəsində 5 mərtəbəli binanın hazırda tikintisi aparılır".