Dekabrın 14-də Fövqəladə Hallar Nazirliyinin Mülki Müdafiə Qoşunlarının Qəbələ rayonunda inşa edilmiş "N" saylı hərbi hissəsinin açılışı olmuşdur. 
Tədbirdən əvvəl fövqəladə hallar naziri general-polkovnik Kəmaləddin Heydərov hərbi hissənin həyətində ulu öndər Heydər Əliyevin büstünün önünə gül dəstəsi qoyaraq dahi şəxsiyyətin xatirəsini ehtiramla yad etmişdir.
Hərbi hissənin əsas binasının foyesində ulu öndər Heydər Əliyevin və Prezident İlham Əliyevin fəaliyyətini əks etdirən fotostendlə tanışlıqdan sonra nazir Kəmaləddin Heydərov zabit heyəti ilə birgə hərbi hissədə mövcud olan obyektlərdən əsgər yataqxanasına, yeməkxanaya, ərzaqsaxlama anbarına, tədris korpusuna, klub binasına, tibb məntəqəsinə, qərargah binasına baxış keçirmişdir. Fövqəladə hallarda istifadə ediləcək texnikalarla yaxından tanış olan Kəmaləddin Heydərov hərbi hissənin zabit heyətinə tapşırıq və tövsiyələrini vermişdir.

AzərTAc