Dekabrın 12-də Azərbaycan Respublikasının Prezidenti yanında Dövlət İdarəçilik Akademiyasında ümummilli lider Heydər Əliyevin xatirəsinə həsr olunmuş anım mərasimi keçirilmişdi. Mərasimdə akademiyanın professor-müəllim, tələbə və müdavimləri iştirak etmişlər. Azərbaycan xalqının və dövlətçiliyinin tarixində müstəsna xidmətləri olmuş dahi şəxsiyyət ulu öndər Heydər Əliyevin xatirəsi bir dəqiqəlik sükutla yad edilmiş, akademiyadakı büstünün önünə gül dəstələri qoyulmuşdur. 
Tədbirdə akademiyanın rektor əvəzi, professor Əlikram Abdullayev çıxış edərək, ümummilli lider, dünya şöhrətli siyasi xadim Heydər Əliyevin xalqımız qarşısındakı misilsiz xidmətlərindən danışmışdır. O, qeyd etmişdir ki, Azərbaycanın müasir tarixində ulu öndər Heydər Əliyevin müstəsna xidmətlərinin ictimai-siyası mahiyyəti hələ uzun illər tədqiqatçıların diqqət mərkəzində olacaq. Türk dünyasının böyük oğlu, müasir Azərbaycan dövlətinin memarı və qurucusu Heydər Əliyevin xatirəsi Azərbaycan adı yaşadıqca daim ürəklərdə yaşayacaqdır.
Sonra akademiyanın "fəlsəfə və sosial psixologiya" kafedrasının müdiri, professor Tofıq Rəsulov, magistratura şöbəsinin müdiri, professor Namik Axundov, aspirantura şöbəsinin müdiri, professor Musa Quluzadə çıxış edərək Azərbaycan xalqının fenomen şəxsiyyəti Heydər Əliyevlə bağlı xatirələrindən, onun həyat və fəaliyyətinin müasir Azərbaycan gəncliyi üçün örnək ola biləcək məqamlarından söhbət açdılar.

Əliqismət BƏDƏLOV, "Xalq qəzeti"