Azərbaycanın Türkiyədəki səfirliyinin Ankarada keçirdiyi ümummilli lider Heydər Əliyevin xatirəsinə həsr edilmiş anım mərasimi qardaş ölkənin bütün aparıcı mətbuat orqanlarının diqqət mərkəzində olmuşdur. 
Anadolu, İhlas, Cihan xəbər agentlikləri yaydıqları informasiyalarında dahi şəxsiyyət Heydər Əliyevin əziz xatirəsinə həsr olunmuş anma mərasimində Prezident Administrasiyası İctimai-siyasi məsələlər şöbəsinin müdiri Əli Həsənovun və Türkiyə Böyük Millət Məclisinin sədri Cəmil Çiçəyin ulu öndərin Türkiyə və bütün türk dünyası qarşısında əvəzsiz xidmətlərinə dair fikirlərinə geniş yer vermişlər.
TRT və "Kanal B" televiziya kanallarında isə Əli Həsənovun ümummilli lider Heydər Əliyevin Türkiyə-Azərbaycan münasibətlərinin inkişafındakı xidmətləri barədə müsahibələri yayımlanmışdır.
"Milliyyət", "Akşam", "Sabah" qəzetləri, "CNN-Türk" televizya kanalı Cəmil Çiçəyin "Ermənistan işğal etdiyi Azərbaycan torpaqlarında təbii sərvətləri məhv edərək insanlığa qarşı bir cinayət törətdiyi, Xocalı qətliamında Ermənistanın hazırkı prezidenti Serj Sarkisyanın iştirak etdiyi" sözlərini önə çıxarmışlar.

Oqtay BAYRAMOV, AzərTAc-ın xüsusi müxbiri
Ankara