Daşqınların qarşısının alınması üçün əlavə tədbirlər planı hazırlanır.
Bunu jurnalistlərə fövqəladə hallar naziri Kəmaləddin Heydərov demişdir.
K.Heydərov bildirmişdir ki, Fövqəladə Hallar Nazirliyinin, Daxili İşlər Nazirliyinin və digər qurumların əməkdaşları təhlükəli ərazilərdə növbə çəkir, boşalan bəndləri bərkidirlər. Hazırda əlavə tədbirlər planı işlənib hazırlanır. Plan barədə ətraflı məlumat veriləcəkdir. İndi əsas diqqətimizi Sarısu gölünə yönəltmişik. Göl və digər istiqamətlərdə daşqınların qarşısının alınması üçün bütün qüvvələr cəlb olunmuşdur, lazımi tədbirlər görülür.