Hər bir dövlətin gücü onun dövlət idarəçiliyindən asılıdır. Dövlət demokratiya və insan haqlarını əsas tutmalıdır. Azərbaycan da bu yolda çalışır.
Bu sözləri Avropa İttifaqının (Aİ) Azərbaycandakı nümayəndəliyinin rəhbəri, səfir Roland Kobia Bakıda keçirilən "Səmərəli dövlət idarəçiliyi: zamanın çağırışları" adlı beynəlxalq konfransda çıxışı zamanı demişdir.
R.Kobia bildirmişdir ki, dövlətdə korrupsiyaya qarşı mübarizə və şəffaflıq əsas məqsəd daşımalıdır: "Bu, təkcə Azərbaycana deyil, Avropa ölkələrinə də aiddir. Biz korrupsiyaya qarşı mübarizənin və şəffaflığın Azərbaycanda uğurla həyata keçirildiyini müşahidə edirik. Azərbaycan Şərqi Avropanın bir hissəsidir. Onun çox gözəl şansı var ki, Avropa İttifaqına daxil olsun. Bu bəlkə də ilk baxışda çox çətin görünür. Amma Avropa və Azərbaycan birlikdə bu məqsədə nail olacaqdır".
Nümayəndəliyin rəhbəri demişdir ki, Azərbaycanın Avropada tanınmasında gələn il Bakıda keçiriləcək "Eurovision - 2012" mahnı müsabiqəsinin böyük əhəmiyyəti olacaqdır: "BMT Təhlükəsizik Şurasının qeyri-daimi üzvü seçilməsi də Azərbaycanı Avropada tanıdacaqdır. Azərbaycan addım-addım Avropa ailəsinə doğru irəliləyir".
AzərTAc