Salyan rayonunun Babazanlı adlanan ərazisində azərbaycanlıların qədim türklər olmasını sübut edən sanballı arxeoloji dəlillər aşkar edilmişdir. Bu barədə şənbə günü Trend-ə Azərbaycan Milli Elmlər Akademiyasının Arxeologiya və Etnoqrafiya İnstitutunun Salyan Arxeoloji Ekspedisiyasının rəisi, tarix elmləri doktoru, professor Arif Məmmədov məlumat vermişdir.
Onun sözlərinə görə, aparılmış tədqiqatlar nəticəsində Babazanlı adlanan ərazidə aşkarlanmış küp qəbirlər üzərində şamanizmlə bağlı təsvirlər var. Bu da Azərbaycan ərazisində qədim türklərin (Oğuz türkləri) tarixin daha erkən dövründə yaşadığını və Azərbaycanın ən qədim sakinlərinin elə türklər olduğunu sübut edir.
"İlk dəfədir ki, Azərbaycan ərazisində küp qəbirlər üzərində şamanizmlə bağlı təsvirlər aşkarlanır. Belə tapıntılar azərbaycanlıların türklərlə bağlılığını əsaslandırmağa və möhkəmləndirməyə xidmət edir", - deyən tarixçi alim qeyd edib ki, ərazidə aşkarlanmış hər küpün ağız hissəsindən 20 santimetr məsafədə - sola doğru 1 ədəd qazan tipli antik qablar qoyulub. Bu da qədim türklərdə tanrıya inam, yəni tanrıçılıq ilə bağlıdır.