Bakı Dövlət Universitetinin (BDU) rektoru, Milli Məclisin deputatı, akademik Abel Məhərrəmov İordaniyanın Ali Təhsil və Elmi Tədqiqatlar Nazirliyinin baş katibi, siyasi elmlər üzrə fəlsəfə doktoru Mustafa əl-Advan ilə görüşmüşdür.
Bakı Dövlət Universitetinin Mətbuat və informasiya şöbəsindən bildirmişlər ki, görüşdə akademik A.Məhərrəmov BDU-nun fəaliyyətindən, beynəlxalq əlaqələrindən danışmışdır.
Mustafa əl-Advan İordaniya Universitetinin BDU ilə əlaqələrinin, xüsusilə nanotexnologiyalar sahəsində əməkdaşlığının səmərəli nəticələr verəcəyinə əminliyini vurğulamışdır.
Tədqiqatçı, tələbə, müəllim mübadiləsini, birgə layihə və proqramlarda iştirakı nəzərdə tutan memorandumun hazırlanması barədə razılıq əldə edilmişdir.
Sonra qonaq BDU-nun laboratoriya və müvafiq mərkəzləri ilə tanış olmuşdur.
Görüşdə İordaniyanın Azərbaycandakı səfiri Adel Mohammad Adaileh iştirak etmişdir.

AzərTAc