Sabirabad rayonunun Qaragüney kəndində Kür çayının səviyyəsi qalxdığından eni 25 metr olan əsas bəndin bəzi hissəsində sızmalar olmuşdur. Buna baxmayaraq, kəndin ərazisində bəndbərkitmə işləri sürətlə aparılır.
Hadisə yerinə Fövqəladə Hallar, Daxili İşlər, Müdafiə nazirliklərinin, Meliorasiya və Su Təsərrüfatı Açıq Səhmdar Cəmiyyətinin və digər aidiyyəti qurumların texnikası və canlı qüvvəsi cəlb olunmuşdur.
Operativ qərargahdan verilən məlumata görə, digər Kürboyu ərazilərdə vəziyyət sabit olaraq qalır və burada da bəndbərkitmə işləri sürətlə aparılır. Horadiz və Bəhramtəpə istiqamətində Araz çayında suyun səviyyəsində azalma müşahidə olunmuşdur. Amma bu azalma Sabirabad və ətraf ərazilərdə, təqribən 5-6 gündən sonra hiss olunacaqdır.
Kür çayının Salyan və Neftçaladan keçən hissələrində suyun səviyyəsində 8 santimetr azalma qeydə alınmışdır.
AzərTAc{nl}