Azərbaycan Milli Elmlər Akademiyası (AMEA), Rabitə və İnformasiya Texnologiyaları Nazirliyi və AMEA Radiasiya Problemləri İnstitutunun (RPİ) birgə təşkilatçılığı ilə "Nüvə enerjisinin dinc məqsədlərlə istifadəsi perspektivləri" mövzusunda dördüncü beynəlxalq konfrans noyabrın 25-də başa çatmışdır. 
Üç gün davam etmiş konfrans altı bölmədə keçirilmişdir. "Nüvə enerjisinin dinc məqsədlərlə istifadəsi", "Nüvə fizikası", "Nüvə və radiasiya təhlükəsizliyi", "Radioekologiya", "Nüvə və radioizotoplu texnologiya və metodların tətbiqi", "Nüvə biliklərinin toplanması və istifadəsi" bölmələrində Azərbaycan alimləri ilə yanaşı, dünyanın bir sıra ölkələrindən alim və mütəxəssislər çıxış etmişlər.
İclaslarda "Radioaktiv çirklənmə ərazilərində xaricdən və daxildən şüalanmalardan mühafizə tədbirləri", "Energetikanın inkişafının texniki-iqtisadi və ekoloji problemləri", "Polimer kompozitlərin dialektik xassələrinə qamma-şüalanmanın təsiri", "Fe əsaslı amorf metallik ərintinin maqnit xarakteristikalarına təzyiqin təsiri", "Nüvə enerjisinin dinc məqsədlərlə istifadəsi və nüvə təhlükəsizliyi", "Neft-bitumlu süxurlardan təbii şəraitdə süzülmüş neftin radiasiya-kimyəvi çevrilmələri" və digər mövzularda ümumilikdə 85 məruzə dinlənilərək müzakirə edilmişdir.
Konfransın materialları toplu şəklində çap olunmuşdur.
AzərTAc