Azərbaycanın və Rusiyanın dövlət sərhəd xidmətləri arasında əlaqələr yüksək səviyyədədir.
AzərTAc xəbər verir ki, bunu jurnalistlərə Rusiya Federasiyası Federal Təhlükəsizlik Xidmətinin Cənub Regional Sərhəd İdarəsinin rəisi, general-polkovnik Nikolay Lisinski demişdir.
N.Lisinski bildirmişdir ki, biz mütəmadi olaraq həm quru, həm də dəniz sərhədlərindəki vəziyyətlə bağlı məlumat mübadiləsi aparırıq.
Azərbaycan Respublikasının Dövlət Sərhəd Xidmətində keçirdiyimiz görüşdə də ölkələrimizin sərhəd xidmətləri arasında əməkdaşlığın vəziyyətini və bir sıra məsələləri müzakirə etmişik. Bizim Azərbaycan haqqında təəssüratlarımız çox yüksəkdir.
Qonaq Azərbaycanın iqtisadi inkişafını və paytaxtda görülən tikinti-quruculuq, abadlıq işlərini də yüksək qiymətləndirmişdir. O demişdir ki, Bakı şəhəri dəyişərək gündən-günə gözəlləşir. Bu şəhərdə olmaq çox maraqlı və xoşdur.