Noyabrın 17-də Azərbaycan Mətbuat Şurası (MŞ) ilə UNESCO-nun Moskva ofisi arasında imzalanmış müqaviləyə əsasən Kommunikasiyanın İnkişafı üzrə Beynəlxalq Proqram (KİBP) çərçivəsində reallaşdırılan "Azərbaycan jurnalistlərinin qlobal iqlim dəyişikliyi sahəsində peşəkarlığının artırılması məqsədi ilə təlim proqramının hazırlanması" layihəsi üzrə müzakirələr aparılmışdır. 
Şurada keçirilmiş görüşdə MŞ, Azərbaycanın Təhsil Nazirliyi, UNESCO üzrə Azərbaycan Respublikası Milli Komissiyası, Azərbaycan Milli MaB (İnsan və Biosfer) Komitəsi və Beynəlxalq Avrasiya Mətbuat Fondunun ekspertlərinin dəstəyi ilə hazırlanmış proqramın kifayət qədər dolğun olduğu vurğulanmışdır.
"Azərbaycan jurnalistlərinin qlobal iqlim dəyişikliyi sahəsində peşəkarlığının artırılması məqsədi ilə təlim proqramının hazırlanması" layihəsi MŞ, UNESCO-nun Moskva ofisi və UNESCO-nun Azərbaycan Milli MaB (İnsan və Biosfer) Komitəsi tərəfindən 2010-cu ilin sentyabrından cari ilin aprelinədək həyata keçirdiyi "İqlim dəyişikliklərinə dair məsələlərin əhatə olunmasının keyfiyyətinin yaxşılaşdırılması məqsədi ilə jurnalistlər üçün təlim" layihəsinin bir növ davamı kimi nəzərdə tutulmuşdur.