Azərbaycanda səfərdə olan BMT-nin İqtisadi-Sosial Şurasının (ECOSOC) QHT-lər üzrə bölməsinin rəhbəri Andrey Abramov noyabrın 16-da Milli Qeyri-Hökumət Təşkilatları Forumunda (MQF) olmuşdur.
MQF-nin mətbuat xidmətindən bildirmişlər ki, görüşdə forumun sədri Rauf Zeyni qurumun 12 illik fəaliyyəti, əldə edilmiş uğurlar, Azərbaycanda vətəndaş cəmiyyətinin vəziyyəti haqqında qonağa ətraflı məlumat vermişdir.
Görüşdə iştirak edən QHT rəhbəri Umud Rəhimoğlu və başqaları BMT ilə əməkdaşlıq əlaqələrinin genişləndirilməsi haqqında fikirlərini bildirmişlər.
A.Abramov Banqladeş, Braziliya, Uruqvay və digər dövlətlərdə QHT-lərin təcrübəsi, vətəndaş cəmiyyətinin inkişafından danışmışdır. Azərbaycanın beş QHT-nin ECOSOC-un üzvü olduğunu qeyd edən qonaq bu təmsilçiliyin gələcəkdə genişləndirilməsinin vacibliyini bildirmişdir.

AzərTAc