Azərbaycan Respublikası ilə Macarıstan Respublikası arasında ticarət dövriyyəsi 80 milyon ABŞ dollarından aşağıdır. Bunun da əsas hissəsi Macarıstandan Azərbaycana ixrac olunan malların payına düşür. Bu, ticarət dövriyyəsinin 99 faizini təşkil edir. 
Bu barədə Azərbaycanda səfərdə olan Macarıstan Milli İqtisadiyyat Nazirliyinin dövlət katibi, hökumətlərarası komissiyanın həmsədri xanım Roza Nad məlumat vermişdir.
Bildirmişdir ki, Macarıstan nümayəndə heyətinin Azərbaycana səfəri iki ölkə arasında ticarət, mədəniyyət, təhsil, idman və s. sahələrdə əməkdaşlığı daha da inkişaf etdirməyə təkan verəcəkdir: "Biz Azərbaycan tərəfi ilə əməkdaşlıq edə biləcəyimiz sahələrə - kənd təsərrüfatı, sənaye, təhsil, energetika, elm, İKT sahələrinə diqqət yetirmişik. Ölkələrimiz arasında ticarət dövriyyəsini artırmaq, həmçinin qarşılıqlı investisiya qoyuluşunu təşkil etmək niyyətindəyik".
Dövlət katibi vurğulamışdır ki, komissiyanın III iclası gələn il Budapeştdə keçiriləcəkdir. İclasda əməkdaşlıq sahəsində görülən işlərin nəticəsi müzakirə olunacaqdır.

AzərTAc