Noyabrın 4-də Bakıda keçirilən Beynəlxalq Mətbuat İnstitutunun (BMİ) Milli Komitələrinin sədrlərinin "Milli Komitələrin inkişaf platforması" adlı I toplantısı başa çatmışdır.
BMİ-nin Azərbaycan Milli Komitəsindən bildirmişlər ki, BMİ-in tarixində ilk dəfə keçirilən bu toplantıda qurumun direktoru xanım Alison Makkanze, katibliyinin nümayəndəsi Kristin Klint, Milli Komitələrin rəhbərləri Karl-Eugene Eberle (Almaniya), Pavol Mudri (Slaveniya), Ravi Naraşimhan (Hindistan), So-Vihan Hyon (Şimali Koreya), Rahim Adedoyin (Nigeriya) Ferai Tinc (Türkiyə) və Latviyadan yeni üzvlüyə qəbul edilən Modris Audinş iştirak etmişlər.
BMİ-nin Azərbaycan Milli Komitəsinin rəhbəri Umud Rəhimoğlunun sədrliyi ilə keçirilmiş toplantıda Milli Komitə rəhbərləri BMİ-nin Regional Əməkdaşlıq strategiyasının inkişaf etdirilməsi məsələsi müzakirə edilmişdir. Müzakirələr nəticəsində qərara alınmışdır ki, gələcəkdə Bakıda BMİ-nin Müstəqil Dövlətlər Birliyinə daxil olan ölkələri əhatə edəcək Regional Təşəbbüs Mərkəzi yaradılsın.
Tədbirin sonunda Bakı Bəyannaməsi qəbul edilmişdir.

AzərTAc