Noyabrın 30-da keçiriləcək bələdiyyələrə təkrar, əlavə və yeni seçkilərdə iştirak etmək üçün imza vərəqələrinin və digər seçki sənədlərinin dairə seçki komissiyalarında qəbulu başa çatmışdır.
Bələdiyyə üzvlüyünə namizədlərin irəli sürülməsi prosesinə sentyabrın 30-dan başlanılmışdır.
Son məlumata görə, seçkilərdə iştirak etmək üçün 85 seçki dairəsi və 330 bələdiyyə üzrə 1520 nəfərin namizədliyi qeydə alınmışdır. Lakin yekun rəqəmlərdə bu sayın artacağı bildirilir.
Qeyd edək ki, bələdiyyə üzvlüyünə namizədliyini 21 yaşı tamam olmuş, müvafiq bələdiyyənin ərazisində yaşayan Azərbaycan Respublikasının vətəndaşları, həmçinin seçicilərin təşəbbüs qrupları, siyasi partiyalar, siyasi partiyaların blokları irəli sürə bilərlər. Seçkilər 86 seçki dairəsi və 330 bələdiyyə üzrə 464 yerə keçiriləcəkdir. Azərbaycanda sonuncu bələdiyyə seçkiləri 2009-cu il dekabrın 23-də keçirilmişdir.