APA-nın FHN-in saytına istinadən verdiyi məlumata görə, hazırda Azərbaycanın göndərdiyi yardım aidiyyəti üzrə təhvil verilir.
Prezident İlham Əliyevin göstərişinə əsasən, Türkiyəyə avtomobil karvanı ilə 1000 ədəd çadır (hər biri 24 kv.m), 40 generator, 40 dəst mətbəx ləvazimatı və 2000-dən artıq ədyal yola salınıb.
Bununla da, Fövqəladə Hallar Nazirliyi tərəfindən ümumilikdə 1250 ədəd çadır, 700 səhra yataq dəsti, 5000-dən artıq ədyal, 2000 yataq dəsti, 40 generator, 40 dəst mətbəx ləvazimatı və 2 səhra mətbəxi təbii fəlakətdən zərər çəkənlərə çatdırılmışdır. Əvvəlki yardımlar təyyarələrlə göndərilmişdir.
Qeyd edək ki, Azərbaycan FHN-in xilasediciləri də Van bölgəsində oktyabrın 24-dən xilasetmə əməliyyatlarına başlayıblar. Onlar indiyədək dağıntılar altından 12 nəfəri xilas edib, 60 cəsəd çıxarıblar.
Van bölgəsində zəlzələ oktyabrın 23-də baş verib. Rəsmi məlumatlara görə, 576 nəfər həlak olmuş, 2608 nəfər yaralanmışdır.