Avropa Birliyinin Azərbaycandakı nümayəndəliyi Azərbaycanın Birləşmiş Millətlər Təşkilatı Təhlükəsizlik Şurasının müvəqqəti üzvü seçilməsinə dair bəyanatla çıxış etmişdir.
Nümayəndəlikdən verilən bəyanatda deyilir: "Avropa Birliyinin nümayəndəliyi Azərbaycanı 2012-2013-cü illəri əhatə edən müddətdə BMT Təhlükəsizlik Şurasının qeyri-daimi üzvü seçilməsi münasibətilə təbrik edir. Azərbaycan hökumətinin göstərdiyi səyləri qəbul edərək 155 ölkə nüfuzlu beynəlxalq təşkilatda ölkənin lehinə səs vermişdir. Bu yeni kontekstdə AB nümayəndəliyi ölkənin Birləşmiş Millətlər Təşkilatının sülh və demokratiya dəyər və prinsipləri ilə bağlı öhdəliklərini rəğbətlə qarşılayır, Avropa Birliyi də bu dəyər və prinsipləri bölüşür. Nümayəndəlik bu yeni status nəticəsində ortaya çıxan çağırış və imkanların cavablandırılmasında Azərbaycana yardım göstərməyə hazırdır. Biz əməkdaşlığın genişlənəcəyinə və bütün beynəlxalq məsələlərdə daha yaxın dialoqun qurulacağına ümidvarıq".