Bu gün Bakıda Türkdili Ölkələrin və Toplumların II Media Forumu öz işinə başlayır. "Kempinski Hotel Badamdar" kompleksində keçirilən məclisin təşkilatçıları Azərbaycan Mətbuat Şurası və Azərbaycan Respublikası Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondudur. 
Forumda Azərbaycanla yanaşı, Türkiyədən, Qazaxıstandan, Qırğızıstandan, Özbəkistandan, Türkmənistandan, Şimali Kipr Türk Cumhuriyyətindən, Rusiya Federasiyasının Tuva, Saxa, Xakasiya, Kabardin-Balkar, Qaraçay-Çərkəz, Tatarıstan, Başqırdıstan respublikalarından, Ukraynanın Krım Muxtar Vilayətindən, Moldovanın Qaqauz Muxtar Ərazisindən, dünyada türklərin yığcam məskunlaşdığı bölgələrdən - İraqdan, Bolqarıstandan, Yunanıstandan, Makedoniyadan, Kosovadan nümayəndələr iştirak edirlər.
Təntənəli açılışdan sonra toplantının ikinci hissəsi panel iclaslar şəklində davam edəcək. Birinci iclasda iştirakçı ölkələrin və toplumların nümayəndələri təmsil etdikləri bölgələrdə fəaliyyət göstərən media qurumlarının vəziyyəti barədə məlumat verəcəklər. Forumun ikinci iclasında iki panel mövzu ətrafında müzakirələr aparılacaq: "Türkdilli ölkə və toplumların mediası qlobal informasiya məkanına inteqrasiyada birləşdirici amil kimi"; "Sosial medianın türkdilli xalqlar yaşayan bölgələrdəki vəziyyəti".
Forumda ötən ilin dekabrında Ankarada Türkdilli Ölkələrin və Toplumların I Media Forumunda yaradılmış Türkdilli Ölkələrin və Toplumların Media Birliyinin qarşıda duran vəzifələri də müəyyənləşdiriləcək.

T.AYDINOĞLU, "Xalq qəzeti"