Noyabrın 30-da keçiriləcək bələdiyyələrə təkrar, əlavə və yeni seçkilərdə iştirak etmək üçün 82 seçki dairəsi və 309 bələdiyyə üzrə 1365 nəfərin namizədliyi qeydə alınmışdır.
Mərkəzi Seçki Komissiyasının mətbuat xidmətindən bildirmişlər ki, ümumilikdə 1561 nəfər imza vərəqi götürmüşdür. Onlardan 1465-i imza vərəqələrini qaytarmışdır.
Qeyd edək ki, bələdiyyə üzvlüyünə namizədlərin irəli sürülməsi prosesi sentyabrın 30-dan başlanmışdır. Bələdiyyə üzvlüyünə namizədliyini 21 yaşı tamam olmuş, müvafiq bələdiyyənin ərazisində yaşayan Azərbaycan Respublikasının vətəndaşları, həmçinin seçicilərin təşəbbüs qrupları, siyasi partiyalar və onların blokları irəli sürə bilərlər. Seçki 86 seçki dairəsi və 330 bələdiyyə üzrə 464 yerə keçiriləcəkdir.

AzərTAc