Ölkəmizdə rəsmi səfərdə olan Gürcüstanın xarici işlər naziri Qriqol Vaşadze oktyabrın 26-da Fəxri Xiyabana gələrək xalqımızın ümummilli lideri, müasir müstəqil Azərbaycan dövlətinin memarı və qurucusu Heydər Əliyevin xatirəsini ehtiramla yad etmiş, məzarı önünə əklil qoymuşdur. 
Görkəmli oftalmoloq alim, akademik Zərifə xanım Əliyevanın da xatirəsi yad olunmuş, məzarı üzərinə gül dəstələri düzülmüşdür.
Sonra Q.Vaşadze Şəhidlər Xiyabanına gələrək, Azərbaycanın azadlığı və suverenliyi uğrunda mübarizədə canlarından keçmiş qəhrəman Vətən övladlarının xatirəsinə ehtiramını bildirmiş, "Əbədi məşəl" abidəsi önünə əklil qoymuşdur.
Gürcüstanlı nazirə Şəhidlər Xiyabanının tarixi və Bakıda görülən abadlıq-quruculuq işləri barədə ətraflı məlumat verilmişdir.