Türkiyə Silahlı Qüvvələri PKK terror təşkilatına qarşı irimiqyaslı əməliyyatı davam etdirir
APA-nın "TRT" kanalına istinadən yaydığı məlumata görə, Hakkarinin Kazan vadisində həyata keçirilən əməliyyatda 53 terrorçu öldürülüb. Əməliyyatın təfərrüatları açıqlanmır. İlkin məlumata görə, pilotsuz kəşfiyyat təyyarələri terrorçuların yerini müəyyənləşdirdikdən sonra vertolyotla əraziyə xüsusi təyinatlı birləşmələr göndərilib. Bundan başqa, Hərbi Hava Qüvvələri səhər saatlarından etibarən Kazan vadisini aramsız bombardman edir.
Qeyd edək ki, Türkiyə mətbuatı bundan əvvəl daha 7 terrorçunun bombardmanlardan ölməsi barədə məlumat yaymışdır. Öldürülən terrorçular arasında PKK-nın rəhbərliyində təmsil olunan üç nəfər də var.