Azərbaycanın fövqəladə hallar naziri, general-polkovnik Kəmaləddin Heydərov ölkəmizdə rəsmi səfərdə olan İspaniya Krallığının Sənaye, Turizm və Ticarət Nazirliyinin xarici ticarət üzrə dövlət katibi Alfredo Bonet Baigetin rəhbərlik etdiyi nümayəndə heyəti ilə görüşmüşdür. 
FHN-dən bildirmişlər ki, görüşdə Kəmaləddin Heydərov nazirlik və onun tabeliyində olan qurumlar və onların fəaliyyəti haqqında ümumi məlumat vermişdir. Həmçinin nazirlik yarandığı tarixdən etibarən nüfuzlu beynəlxalq və regional təşkilatlarla, xarici dövlətlərin müvafiq qurumları ilə əlaqələrin inkişaf etdirilməsi istiqamətində aparılan işləri də qonağın diqqətinə çatdırmışdır.
Qonaq, öz növbəsində Azərbaycan ilə İspaniya Krallığı arasında aidiyyəti qurumların əməkdaşlıq əlaqələrinin daha da genişləndirilməsi və inkişaf etdirilməsinin vacibliyini qeyd etmiş və bu əlaqələrin dərinləşməsi üçün birgə səylər göstəriləcəyini vurğulamışdır.

AzərTAc