Rabitə və İnformasiya Texnologiyaları Nazirliyinin Azərmarka şirkəti Azərbaycanın müstəqilliyinin bərpasının 20-ci ildönümünə həsr edilən markalar seriyasını təqdim edib.  
Silsiləyə 4 markadan ibarət kiçik vərəq və 2 poçt bloku daxildir. Kiçik vərəqənin markalarında Azərbaycan Respublikasının dövlət himni, dövlət bayrağı, dövlət himninin mətni, notları və xəritə təsvir olunub.
Markaların nominal dəyəri 1 manata bərabərdir. Poçt bloklarının birində Azərbaycanın ümummilli lideri Heydər Əliyevin şəkli əks edilib. İkinci poçt blokunda isə Azərbaycanın dövlət bayrağı və xəritəsi çap edilib. Hər iki blokun nominal dəyəri 2 manat təşkil edir.
Bütün seriyanın bədii tərtibatında əlamətdar 18 oktyabr 1991-ci il - müstəqilliyin bərpası günü və bu tarixin 20 illik yubileyinə həsr edilən xüsusi loqotip yer alıb. Belarusda çap edilən markaların hər biri 5 min ədəd tirajla buraxılıb.

M.MÜKƏRRƏMOĞLU, "Xalq qəzeti"