Azərbaycan gənclərinin xaricdə təhsil alması üçün bu il Dövlət Neft Fondundan 15 milyon manat vəsait ayrılıb. APA-nın məlumatına görə, təhsil nazirinin müavini Qulu Novruzov bildirmişdir ki, həmin vəsait Azərbaycan gənclərinin yaşayış, təhsil, sığorta və illik gediş-gəliş xərclərinə sərf olunur: "Elə tələbələrimiz var ki, il ərzində onların yaşayış və təhsil xərclərinə 50-60 min avro xərclənir".
Nazir müavini qeyd etmişdir ki, hazırda Azərbaycandan kənarda 10 minə yaxın gənc təhsil alır. Onların çoxu öz vəsaiti hesabına təhsil alır. Ümumiyyətlə, isə xaricdə təhsilə ictimaiyyətdə maraq böyükdür. "2007-2015-ci illərdə xaricdə təhsillə bağlı Dövlət Proqramı"nın icrasına başlanandan sonra bu maraq daha da artmışdır.