Oktyabrın 4-də Azərbaycanın xarici işlər naziri Elmar Məmmədyarov ölkəmizdə səfərdə olan Belçikanın xarici siyasət idarəsinin ikitərəfli işlər üzrə baş direktoru Qeert Muyllenin rəhbərlik etdiyi nümayəndə heyəti ilə görüşmüşdür.
Xarici İşlər Nazirliyinin mətbuat xidmətindən bildirmişlər ki, görüşdə ikitərəfli münasibətlərin hazırkı vəziyyəti müzakirə olunmuşdur. Qonaqlara Azərbaycanın enerji strategiyası, regionda həyata keçirilən iqtisadi layihələrin əhəmiyyəti barədə ətraflı məlumat verilmişdir.
Görüşdə Avropanın enerji təhlükəsizliyinin təmin edilməsində Azərbaycanın mühüm strateji rolu vurğulanaraq Avropa İttifaqı ilə ölkəmiz arasında münasibətlər, iqtisadi və enerji sahələrində əməkdaşlıq perspektivləri, eyni zamanda, qarşılıqlı maraq doğuran bir sıra məsələlər ətrafında fikir mübadiləsi aparılmışdır.
Q.Muyllenə Ermənistan-Azərbaycan, Dağlıq Qarabağ münaqişəsi və onun sülh yolu ilə nizamlanması istiqamətində atılan addımlar barədə də ətraflı məlumat verilmiş, məsələnin Azərbaycanın ərazi bütövlüyü çərçivəsində həll olunmasının vacibliyi vurğulanmışdır.