Azərbaycanın Xarici İşlər Nazirliyindən bildirmişlər ki, oktyabrın 4-də nazir Elmar Məmmədyarov Böyük Britaniyanın ölkəmizdə yeni təyin olunmuş səfiri Piter Beytmen ilə görüşmüşdür.
Etimadnaməsinin surətini nazirə təqdim edən P.Beytmen ölkəmizdə səfir təyin olunmasından məmnunluğunu ifadə etmişdir.
Diplomat ölkələrimiz arasında bir sıra istiqamətlərdə, xüsusilə iqtisadi və ticarət sahələrində əməkdaşlığın inkişaf etdirilməsi üçün geniş potensialın olduğunu vurğulamışdır. Səfir Azərbaycan-Böyük Britaniya əlaqələrinin daha da genişləndirilməsi istiqamətində səylər göstərəcəyini demişdir.
E.Məmmədyarov britaniyalı diplomatı Azərbaycanda səfir təyin olunması münasibətilə təbrik etmiş, ona işlərində müvəffəqiyyətlər arzulamışdır.
Görüşdə qarşılıqlı maraq doğuran bir sıra məsələlər müzakirə olunmuşdur.