Qafqaz Müsəlmanları İdarəsinin (QMİ) sədri şeyxülislam Allahşükür Paşazadə oktyabrın 1-2-də İran İslam Respublikasında səfərdə olacaqdır.
QMİ-nin mətbuat xidmətindən bildirmişlər ki, şeyxülislam A.Paşazadə Tehranda keçiriləcək "Fələstin xalq hərəkatının müdafiə olunması" mövzusunda V iclasda iştirak edəcəkdir.
Səfər İran Parlamentinin sədri Əli Laricaninin dəvəti ilə həyata keçirilir.
İclasda A.Paşazadənin məruzəsi dinləniləcəkdir. Şeyxülislam məruzəsində Fələstin xalqının haqlı mübarizəsinə Azərbaycan dövlətinin dəstəyi, bu sahədə görülmüş işlər, müsəlman həmrəyliyinin bu problemin həllində rolu, Ermənistan-Azərbaycan, Dağlıq Qarabağ münaqişəsinin nizamlanmasında islami birlik amilinin əhəmiyyətindən bəhs edəcəkdir.
Səfər çərçivəsində A.Paşazadənin İranın rəhbərliyi və rəsmi şəxsləri ilə görüşləri nəzərdə tutulmuşdur.

AzərTAc