Sentyabrın 23-də Qafqaz Müsəlmanları İdarəsinin (QMİ) sədri şeyxülislam Allahşükür Paşazadə Səudiyyə Ərəbistanı Krallığının İslam, vəqflər, dəvət və irşad işləri nazirinin müavini Əbdüləziz ibn Abdullah əl-Əmmarın rəhbərlik etdiyi nümayəndə heyəti ilə görüşmüşdür.
A.Paşazadə ölkələrimiz arasında əlaqələrin yüksək səviyyədə olduğunu məmnunluqla qeyd etmişdir. Bu yaxınlarda Səudiyyə Ərəbistanına səfəri çərçivəsində keçirilmiş görüşlər barədə danışan A.Paşazadə demişdir ki, həm dini, həm də siyasi əlaqələrin güclənməsi dövlətlər arasında qarşılıqlı əlaqələrin inkişafına təkan verir. Ölkəmizdə dinə, milli mənəvi dəyərlərə yüksək qiymət verildiyini vurğulayan A.Paşazadə Azərbaycanda vaxtilə 18 məscidin fəaliyyət göstərdiyini, indi isə bunların sayının 800-dən çox olduğunu diqqətə çatdırmış, yeni məscid binalarının tikildiyini, yenidənqurma işlərinin aparıldığını diqqətə çatdırmışdır.
Nazir müavini Əbdüləziz ibn Abdullah əl-Əmmar ölkəsi ilə Azərbaycan arasında dost və qardaş münasibətlərin olmasından məmnunluğunu ifadə etmişdir. QMİ ilə təmsil etdiyi nazirlik arasında əməkdaşlıq əlaqələrindən danışan qonaq İslam əlyazmaları ilə bağlı dəqiq araşdırmaların aparılmasının vacibliyini bildirmişdir. Əbdüləziz ibn Abdullah əl-Əmmar Səudiyyə Ərəbistanının Ermənistan-Azərbaycan, Dağlıq Qarabağ münaqişəsinə münasibətinin birmənalı və dəyişməz olduğunu, ölkəsinin Azərbaycanın ərazi bütövlüyünü daim dəstəklədiyini xatırlatmışdır.
Görüşdə iki ölkə arasında əlaqələrin uğurla inkişaf etdiyi vurğulanmış, dinlərarası münasibətlər və digər aktual məsələlər müzakirə olunmuşdur.

AzərTAc