Avropa İttifaqının (Aİ) Azərbaycandakı nümayəndəliyindən AzərTAc-a bildirmişlər ki, Avropa Komissiyası sentyabrın 19-da qısamüddətli vizaların verilməsi prosedurasının sadələşdirilməsi, həmçinin Aİ ilə ölkəmiz arasında qeyri-leqal miqrantların readmissiyası ilə bağlı danışıqlara başlamağı təklif etmişdir.
"Viza verilməsi qaydalarının sadələşdirilməsi Aİ ilə Azərbaycan arasında əməkdaşlıq və təcrübə mübadiləsini yaxşılaşdıracaqdır. Viza rejiminin sadələşdirilməsi və readmissiya - "Şərq tərəfdaşlığı" proqramının uğurlu nəticələridir və bilirəm ki, bu həmin ölkələrin vətəndaşları üçün nə qədər mühüm əhəmiyyət kəsb edir", - deyə Aİ-nin daxili işlər üzrə komissarı Sesiliya Malmstrem vurğulamışdır.
Aİ-nin Avropa Qonşuluq Siyasəti və genişlənmə üzrə komissarı Ştefan Füle isə bildirmişdir ki, viza rejiminin sadələşdirilməsi yolu ilə əlaqələrin inkişafı sosial-iqtisadi inkişaf və qarşılıqlı fəaliyyət baxımından çox mühümdür.