Azərbaycanda avtomobillərin dövlət nömrə nişanlarında tətbiq olunan yeniliklər nəqliyyat vasitələrini yeni qeydiyyatdan keçirənlərə şamil olunacaq. Bu barədə "Trend"ə Daxili İşlər Nazirliyinin Baş Dövlət Yol Polisi İdarəsinin şöbə rəisi Kamran Əliyev məlumat vermişdir.
Onun sözlərinə görə, dövlət nömrə nişanlarında ilk baxışdan fərq hiss olunmasa da, nömrələrin keyfiyyəti yüksəldilib və bununla bağlı yeni standartlar qəbul olunmuşdur.
Azərbaycanda avtomobillərin dövlət nömrə nişanlarındakı dəyişikliyə görə, nişanın üzərində olan Azərbaycanın dövlət bayrağı dalğalı formada deyil, artıq düzbucaq formasında vurulur. Həmçinin, nömrələrin üzərində olan yazıların qopmaması üçün yeni standartlar qəbul olunmuşdur.
Eyni zamanda, şablonda yazı üçün seçilmiş şrift də dəyişdirilmişdir.