Bakı Şəhər Prokurorluğu və Baş Polis İdarəsi "Təfəkkür" Universitetinin prorektoru Tariyel Əhmədovun ölümü ilə bağlı birgə məlumat yaymışlar. 
Məlumatda deyilir: "Sentyabrın 16-da saat 08:00 radələrində Yasamal rayonu, Şərifzadə küçəsi, 527/21-ci məhəllə, ev 2A, mənzil 8-də yaşamış, "Təfəkkür" Universitetinin prorektoru vəzifəsində işləmiş 1942-ci il təvəllüdlü Əhmədov Tariyel İbrahim oğlunun başının arxa təpə nahiyəsində beyin sümüklərinin qəlpəli sınığı xəsarətləri ilə müşayiət olunan meyiti Yasamal rayonu, Şərifzadə küçəsi 8 saylı ünvanda yerləşən yaşayış binasının qarşısındakı idman meydançasında aşkar edilmişdir.
Bakı Şəhər Prokurorluğu, Yasamal Rayon Prokurorluğu, Bakı şəhər Baş Polis İdarəsi və Yasamal Rayon Polis İdarəsinin əməkdaşlarının, məhkəmə-tibb ekspertin iştirakları ilə hadisə yerinə və meyitə baxış keçirilmiş, iş üçün əhəmiyyət kəsb edən maddi sübutlar götürülmüş və digər zəruri təxirəsalınmaz istintaq-əməliyyat hərəkətləri aparılmışdır.
Faktla bağlı Azərbaycan Respublikası Cinayət Məcəlləsinin 120.1-ci maddəsi ilə cinayət işi başlanmaqla, Bakı şəhər prokurorluğunun və şəhər BPİ-nin əməkdaşlarından ibarət birgə istintaq qrupu yaradılmışdır.
Hazırda iş üzrə şəhər prokurorluğunda intensiv istintaq-əməliyyat tədbirləri davam etdirilir".

AzərTAc