ABŞ-da fəaliyyət göstərən Qarabağ Fondunun www.karabakhfoundation.org ünvanında yerləşən veb səhifəsi xaker hücumuna məruz qalmışdır. 
Fonddan AzərTAc-a bildirmişlər ki, DDOS - xaker hücumu nəticəsində Fondun saytı tamamı ilə dağıdılmışdır.
İlkin araşdırma nəticəsində sayta xaker hücumunun Ermənistan ərazisindən həyata keçirildiyi məlum olmuşdur. Qısa müddət ərzində fondun səhifəsi yenidən bərpa edilmişdir. Xaker hücumunun təkrarlanacağını nəzərə alaraq Fondun texniki-təchizat şöbəsi gücləndirilmiş iş rejiminə keçmişdir.
Son zamanlar Qarabağ Fondu dəfələrlə Ermənistan mətbuatında tənqid atəşinə tutulur.
Qarabağ Fondu ABŞ-da yaradılmış və mərkəzi ofisi Vaşinqton şəhərində yerləşən qeyri-hökumət təşkilatıdır. Bu təşkilat Birləşmiş Ştatlarda QHT-lərə verilən yüksək 501 (C) 3 statusuna malikdir. Fondun əsas məqsədi Azərbaycan, Dağlıq Qarabağ və bütünlükdə Qafqazı tanıtmaq, Azərbaycan mədəniyyəti və musiqisini Amerikada tərənnüm və təbliğ etməkdən ibarətdir. Bunun üçün isə Qarabağ Fondu ABŞ-da müxtəlif sərgi, ictimai proqram, forum və mübadilə proqramlarını həyata keçirir.

AzərTAc