Qubkin adına Rusiya Dövlət Neft və Qaz Universitetində həmvətənimiz, Qərbi Sibir neft yataqlarını kəşf edənlərdən biri, geologiya-mineralogiya elmləri doktoru, Rusiya Elmlər Akademiyasının müxbir üzvü, Sosialist Əməyi Qəhrəmanı, Lenin mükafatı laureatı Fərman Salmanovun anadan olmasının 80 illiyinə həsr edilmiş elmi-praktiki konfrans keçirilmişdir. 
Bu tədbir Rusiya Neft-Qaz Sənayeçiləri İttifaqının (RNQSİ) himayəsi altında təşkil edilmişdir. Konfransda RNQSİ-nin prezidenti Gennadi Şmal, Rusiya EA vitse-prezidenti, akademik Nikolay Laverov, Rusya EA Neft və Qaz Problemləri İnstitutunun direktoru, akademik Anatoli Dmitriyevski, akademik Aleksey Kontoroviç, 1970-1978-ci illərdə RSFSR geologiya naziri olmuş Lev Rovnin, Fərman Salmanovun ailə üzvləri və Azərbaycanın Rusiyadakı səfirliyinin nümayəndələri iştirak etmişlər.
Çıxış edənlər Qərbi Sibirin neft-qaz yataqlarının kəşfinə Fərman Salmanovun verdiyi töhfəni, Rusiyada geologiyanın inkişafında onun rolunu qeyd etmiş, gözəl şəxsi keyfiyyətlərini xatırlamışlar. Rusiya Neft-Qaz Sənayeçiləri İttifaqının prezidenti Gennadi Şmal demişdir: "Fərman Salmanovun həyatı böyük bir hadisədir. Bu gün biz onun şərəfli ömür yolunu xatırlamaqla, həm də Tümen torpağının sərvətlərini üzə çıxararaq onları Vətənin xidmətinə təqdim etmiş müxtəlif peşələrə sahib olan yüz minlərlə insanın şücaətini və fədakarlığını yad edirik".