2010-2011-ci tədris ilində Nəsimi rayonunda uğurlar əldə edilib. Rayonun 4 məktəbi "Ən yaxşı məktəb", 17 pedaqoq isə "Ən yaxşı müəllim" müsabiqəsinin qalibi olmuşdur. Bu il orta məktəbi bitirərərək ali məktəblərə sənəd verən 1730 məzundan 1121-i qəbul olunmuşdur. Qəbul imtahanlarında 50-dən artıq məzun 600-dən yuxarı, 12 nəfər isə 650-dən yuxarı bal toplamışdır. 5 nəfər Prezident təqaüdünə layiq görülmüşdür. 
Nəsimi Rayon İcra Hakimiyyətində bu il rayonun məktəblərini bitirərək yüksək balla ali təhsil müəssisələrinə qəbul olmuş məzunlarla görüş keçirilmişdir. Görüşü rayon icra hakimiyyətinin başçısı Nəsib Məhəməliyev açaraq gəncləri əldə etdikləri uğurla əlaqədar təbrik etdi, onlara müvəffəqiyyət arzuladı.
Sonra 19 nömrəli məktəbin direktoru M.Qəmbərov, 46 nömrəli məktəbin direktoru S.Budaqova, 240 nömrəli məktəbin direktoru E.Məmmədova və məzunlar çıxış etdilər.
Tədbirin sonunda məzunlara qiymətli hədiyyələr təqdim edildi və onlarla xatirə şəkil cəkdirildi.
Nəsimi rayonunda yeni tədris ilinə hazırlıqla bağlı 6 orta məktəbdə əsaslı təmir işləri başa çatır. 2 orta məktəbdə isə əlavə korpus tikintisi ilin sonunadək başa çatdırılacaq. Eyni zamanda, 4 məktəbəqədər müəssisədə əsaslı təmir işləri yekunlaşmaq üzrədir.

Ayaz HƏMİDOĞLU, "Xalq qəzeti"