Azərbaycan səhiyyə nazirinin müavini Elsevər Ağayev yaşı 70-dən çox olan səhiyyə işçilərinin dövlət müəssisələrində öz fəaliyyətini davam etdirməsi üçün əsas götürüləcək meyarları açıqlayıb.
APA-nın məlumatına görə, nazir müavini bildirib ki, dövlət tərəfindən fəxri adlar almış, orden və medallara layiq görülmüş yaşı 70-dən yuxarı olan səhiyyə işçiləri ilə əmək müqaviləsi 1 il müddətinə uzadıla biləcək.
Elsevər Ağayev işdən çıxarılan həkimlərin yerinə gələn kadrların səviyyəsi ilə bağlı sualı belə cavablandırmışdır: "Proses indi başlayıb və davam etməkdədir. Bu məsələ dövlət tərəfindən nəzərə alınmışdır. Bu prosesdə bizim ən ağrılı yerimiz elmi-tədqiqat müəssisələrində, universitetlərdə, elmi müəssisələrdə çalışan təcrübəli şəxslərin yaş senzinə məruz qalacağı ilə bağlı idi. Lakin qeyd olunan kateqoriyadan olan şəxslərə yaş senzi tətbiq olunmayacaq. Yaşı 65-dən yuxarı olan səhiyyə işçiləri isə özəl sektorda çalışa bilərlər".