Azərbaycan Davos İqtisadi Forumu çərçivəsində işıq üzü görən "Qlobal rəqabət indeksinin" 2011-2012-ci illər üçün tərtib edilmiş cədvəlində 55-ci yerdə qərarlaşıb.
APA-nın "Qlobal rəqabət indeksi 2011-2012" hesabatına istinadən verdiyi məlumata görə, ötən ilə nisbətən Azərbaycan reytinqdə iki pillə irəliləmişdir.
Tərtib edilmiş cədvələ ümumilikdə 142 ölkə daxil edilmişdir. Birinci yerdə İsveçrənin qərarlaşdığı qlobal reytinq cədvəlində Ermənistan 92-ci yerdə mövqe tutub. Azərbaycan indeksinə görə 87 ölkəni, o cümlədən Türkiyə, Rusiya, Latviya, Slovakiya, Qazaxıstan kimi ölkələri geridə qoyub.
Qeyd edək ki, "Qlobal rəqabət indeksi" müxtəlif ölkələrin iqtisadi rəqabət qabiliyyətini müəyyən edir. Bura müxtəlif meyarlar (ümumilikdə, 110 meyar), o cümlədən bu və ya digər ölkənin makroiqtisadi göstəriciləri, infrastruktur, təhsil, rabitə və digər sahələrin inkişaf səviyyəsi aiddir.