Dünən saat 05.00 radələrində "BAKU STEEL COMPANY" MMC-nin yeni istifadəyə verilmiş poladəritmə sexində baş vermiş hadisədə zavodun 3 nəfər işçisi həyat üçün təhlükəli olmayan müxtəlif dərəcəli yanğın xəsarəti almışlar. Onlardan biri tibbi müayinə olunduqdan sonra dərhal evə buraxılmış, digər ikisi isə əvvəlcə zavodun tibb məntəqəsinə, sonra isə 5 saylı şəhər xəstəxanasına yerləşdirilmişlər. Hazırda onların da vəziyyəti qənaətbəxşdir.
Eyni zamanda, zavodda baş verən bu hadisənin bir sıra KİV-lərdə "partlayış" kimi təqdim olunması da təəssüf hissi doğurur. Bildiririk ki, gün ərzində burada iş bərpa olunmuş və hazırda zavodda iş əvvəlki ahəngi ilə davam etdirilməkdədir.

"BSC"nin mətbuat xidməti