Rusiya prezidenti tərəfindən Sankt-Peterburq qubernatoru təyin edilmiş Georgi Poltavçenko əslən bakılıdır.
APA-nın məlumatına görə, Rusiyanın ikinci böyük şəhəri olan Peterburqun yeni rəhbəri 23 fevral 1953-cü ildə Azərbaycan paytaxtında hərbi dənizçi ailəsində anadan olmuşdur.
Yeni qubernatorun atası Serqey Poltavçenko Xəzər donanmasında divizion komandiri olmuşdur. Poltavçenko 7 yaşında ikən ailəsi Leninqrada köçmüşdür. Buna səbəb Xruşşovun təşəbbüsü ilə Sovet ordusunda aparılan ixtisarlar nəticəsində Serqey Poltavçenkonun işsiz qalması idi.
1976-cı ildə Leninqradda ali təhlisilini başa vuran Poltavçenko öncə yerli hərbi müəssisələrdə, daha sonra isə Dövlət Təhlükəsizlik Komitəsində çalışmışdır.
Yeni təyinatından öncə Poltavçenko Rusiya Prezideninin Mərkəzi Federal Dairədə səlahiyyətli nümayəndəsi olmuşdur. Rusiya mətbuatının yazdığına görə, Poltavçenko hazırkı Rusiya rəhbərliyinin ən etibarlı şəxslərindən biridir.