Almaniyada sentyabrın 16-dan 22-dək keçiriləcək Ermənistan mədəniyyəti günləri çərçivəsində Dağlıq Qarabağdakı oyuncaq rejimin qondarma "müstəqilliyinin 20 illiyi"nə həsr edilmiş konsert verilməsi planlaşdırılır. Almaniya Azərbaycanlılarını Əlaqələndirmə Mərkəzi (AAƏM) bununla əlaqədar etiraz tədbirlərini fəallaşdırmışdır.
AAƏM Baden-Vürtemberq əyalətinin rəhbərliyinə, həmçinin Ştutqart şəhərinin bələdiyyəsinə etiraz məktubları göndərmişdir. Avropa Azərbaycanlılar Konqresi, Almaniya Azərbaycan Diasporunun Mərkəzi Şurası, Azərbaycan-Türkiyə İttifaqı və bir sıra başqa cəmiyyətlər də bu aksiyaya qoşulmuşlar. Məktubda Ermənistanın Azərbaycana qarşı işğalçı siyasəti, Ermənistanın BMT qətnamələrini yerinə yetirməməsi, habelə bu cür tədbirlər keçirilməsinin qarşısını almağın zəruri olması vurğulanır.
Məktubu azərbaycanlılarla yanaşı, almanlar və yəhudi icmasının nümayəndələri də imzalamışlar.

AzərTAc