Ermənistan Azərbaycanın işğal etdiyi əraziləri geri qaytarmalı və işğalçılıq siyasətinə son qoymalıdır. 
Bu bəyanat İtaliyanın Beynəlxalq Münasibətlər İnstitutunda (BMİ) Ermənistan-Azərbaycan, Dağlıq Qarabağ münaqişəsinə həsr olunmuş konfransda səslənmişdir.
Romada keçirilmiş "Dağlıq Qarabağ ətrafında danışıqların gələcəyi" adlı konfransda İtaliya BMİ-nin direktoru, professor Ettore Qreko və direktor müavini Natali Toççi, Londondakı Münaqişə Dövlət Quruculuğu İnformasiya Şəbəkəsinin icraçı direktoru Dennis Sammut, Milan Katolik Universitetinin professoru Valeria Piaçentini də iştirak etmişlər.
Ermənistan-Azərbaycan, Dağlıq Qarabağ münaqişəsi ilə bağlı məruzələrdə vurğulanmışdır ki, Ermənistanın işğalçı siyasəti nəticəsində bir milyondan çox azərbaycanlı öz doğma yurd-yuvalarından didərgin düşmüşdür. Ermənistan tərəfinin tez-tez atəşkəs rejimini pozması isə beynəlxalq hüququn normalarına və prinsiplərinə ziddir. Bildirilmişdir ki, işğal olunmuş torpaqlarda xeyli sayda tarixi, dini və mədəniyyət abidələri dağıdılmışdır.
Konfransda Ermənistan-Azərbaycan, Dağlıq Qarabağ münaqişəsinə dair suallar cavablandırılmış, mövzu ilə bağlı ətraflı müzakirələr aparılmışdır.

AzərTAc