Azərbaycan Mətbuat Şurasının "Qara siyahı"sına daxil edilmiş "Gündəm xəbər" qəzetində şəxsi həyatın toxunulmazlığı prinsiplərinə laqeyd yanaşıldığına, səhifələrində insanların şərəf və ləyaqətini ləkələyən məlumatlar yayıldığına, "Jurnalistlərin peşə davranışı qaydaları"nın mütəmadi pozulduğuna görə müvafiq tədbirlər görülməsi barədə şuranın müraciəti Baş Prokuror yanında Korrupsiyaya Qarşı Mübarizə İdarəsində araşdırılmışdır.
AzərTAc Baş Prokurorluğun saytına istinadla xəbər verir ki, "Gündəm xəbər" qəzetinin təsisçisi Cəfəri Şirin Abbasqulu oğlu tərəfindən "Kütləvi informasiya vasitələri haqqında" Qanunun tələbləri kobud surətdə pozulmaqla yanaşı, eyni zamanda, vergi qanunvericiliyinin tələblərinə də əməl olunmaması müəyyən edilmişdir. Belə ki, vergi ödəyicisi kimi verginin hesablanması üçün zəruri olan hesabatlar tərtib olunmamış, qanunvericilikdə nəzərdə tutulmuş qaydada mühasibat uçotu aparılmamış, o cümlədən dərc olunmuş tirajın sayı göstərilməmiş, nağd pul hesablaşmalarının aparılması qaydaları pozulmuş və 68.244 manat məbləğində vəsait vergidən yayındırılmışdır.
Faktla bağlı qəzetin təsisçisi Şirin Cəfəri barəsində Azərbaycan Respublikası Cinayət Məcəlləsinin 213.2.2-ci (vergi ödəməkdən yayınma) və 308.1-ci (vəzifə səlahiyyətlərindən sui-istifadə) maddələri ilə cinayət işi başlanmışdır.
Hazırda Baş Prokuror yanında Korrupsiyaya Qarşı Mübarizə İdarəsində iş üzrə istintaq davam etdirilir.{nl}