Azərbaycanın Quba rayonunun ən qədim yaşayış məntəqələrindən sayılan Xınalıqda arxeoloji qazıntılar aparılır. Ərazidə çalışan arxeoloq İdris Əliyevin APA-nın şimal bürosuna verdiyi məlumata görə, qısa vaxt ərzində arxeoloji qazıntılar zamanı Xınalıq Dövlət Qoruğunun ərazisindən qədim yaşayış məntəqəsi və kurqan aşkar edilmişdir. Arxeoloqun sözlərinə görə, tapıntıların olduqca qədim bir dövrə aid olması şübhəsizdir. Həmçinin kurqanın yerləşdiyi ərazidə insanların qədim yaşayış məskəni olduğu ehtimal edilən bir neçə mağara da aşkar olunmuşdur. Bütün dəqiq məlumatlar isə ərazidə aparılan tədqiqat işləri başa çatdıqdan sonra məlum olacaq. Arxeoloji qazıntılar Mədəniyyət və Turizm Nazirliyi tərəfindən həyata keçirilir.