Beynəlxalq Gənclər Günü 1998-ci il avqustun 8-dən 12-dək Lissabon şəhərində keçirilmiş gənclər nazirlərinin birinci toplantısında təsis edilmişdir. O vaxtdan avqustun 12-si dünyanın müxtəlif ölkələrində qeyd olunur. 
Bu münasibətlə Gənclər üçün Təhsil Mərkəzi (GTM) avqustun 10-da Füzuli və İmişli rayonlarında gənclərin, yerli qurumların iştirakı ilə tədbirlər keçirmişdir.
GTM-in mətbuat xidmətindən verilən məlumata görə, tədbirlərdə çıxış edənlər bu əlamətdar günün əhəmiyyətindən, Azərbaycan gənclərinin beynəlxalq aləmdə nüfuzunun artmasından və qazandığı uğurlardan danışmışlar.
Sonra gənclər mədəniyyət, incəsənət, idman, elm, təhsil, texnologiya və başqa sahələrdə istedadlarını nümayiş etdirmişlər. Onlara diplom və hədiyyələr təqdim olunmuşdur.
Tədbirlərdə iştirakçıların diqqətinə çatdırılmışdır ki, Ermənistanın işğalçılıq siyasəti nəticəsində on minlərlə Azərbaycan gəncinin hələ də öz yurd-yuvasından didərgin düşməsinə beynəlxalq ictimaiyyətin göz yumması barədə BMT-nin katibliyinə məlumat veriləcəkdir.

AzərTAc