İran istiqamətindən dövlət sərhədini pozaraq Azərbaycana keçmək istəyən silahlı şəxs yaxalanmışdır. 
Bu barədə Dövlət Sərhəd Xidmətinin mətbuat mərkəzindən məlumat vermişlər.
Məlumatda bildirilir ki, iyulun 14-də Yardımlı rayonunun Daşkənd kəndi yaxınlığında yerləşən sərhəd zastavasının xidməti ərazisində İran istiqamətindən dövlət sərhədini pozarkən 1 nəfər silahlı İran vətəndaşı saxlanılmışdır.
Sərhəd pozucusunun üzərinə baxış keçirilərkən bir ədəd "KİNG-2500" markalı tapança, 1,2 qram heroin aşkarlanmışdır.
DSX-nin əməkdaşları tərəfindən "Xaş-xaş-2011" şərti adı altında həyata keçirilmiş kompleks əməliyyat-axtarış tədbirləri nəticəsində iyulun 20-də Zaqatala rayonunun Ağdamkələl kəndində 7 hektar sahədən 13 ton yabanı halda bitmiş çətənə kolu yığılmış, yerli hüquq-mühafizə orqanları əməkdaşlarının və ictimaiyyət nümayəndələrinin iştirakı ilə yandırılaraq məhv edilmişdir.