"Bakıda İstiqlal Muzeyinin tikintisi ilə bağlı dövlət başçısının sərəncamı yüksək dəyərə malikdir. Bu qərar xalqımızın istiqlal tarixinə olan münasibətin ifadəsidir". Bu fikirləri AMEA-nın Tarix İnstitutunun direktoru, Milli Məclisin deputatı Yaqub Mahmudov demişdir.
Y.Mahmudov bildirmişdir ki, Azərbaycan xalqının istiqlal tarixinin öyrənilməsi istiqamətində alimlərimiz tərəfindən indiyə qədər bir sıra vacib araşdırmalar aparılmış, dəyərli tədqiqat əsərləri nəşr olunmuşdur. Bütün bunlar isə dövlətimizin dəstəyi ilə reallaşmışdır. "Ümummilli liderimiz Heydər Əliyev hər zaman Azərbaycan tarixinin, xüsusilə istiqlal tariximizin dərindən öyrənilməsi ilə bağlı alimlərimizə tövsiyələr verirdi. Ulu öndərimiz bu yöndə tarixi əhəmiyyətli sərəncamlar imzalamışdır. Bu gün cənab Prezident İlham Əliyev də bu yolu uğurla davam etdirərək tariximizin öyrənilməsi istiqamətində ciddi qərarlar verir. İstiqlal Muzeyinin tikintisi ilə bağlı Prezident Sərəncamı da bu baxımdan xüsusi önəm daşıyır. Hesab edirəm ki, bu muzey xalqımızın istiqlal mübarizəsinə dair zəngin tarixi və elmi mənbə olacaq".