Avqustun 3-də Bakıda Azərbaycan Respublikası Silahlı Qüvvələrinin xarici ölkələrdə və beynəlxalq təşkilatlarda akkreditə olunmuş hərbi attaşe və hərbi nümayəndələrinin toplantısı başlamışdır. 
Müdafiə Nazirliyinin mətbuat xidmətindən bildirmişlər ki, Silahlı Qüvvələrin Hərbi Akademiyasında keçirilən toplantıda nazirliyin beynəlxalq hərbi əməkdaşlıq idarəsinin rəisi, general-mayor Ramiz Nəcəfov Silahlı Qüvvələrin beynəlxalq əməkdaşlıq fəaliyyətini geniş təhlil etmişdir.
Toplantıda Silahlı Qüvvələrin ikitərəfli əməkdaşlıq fəaliyyəti, hədəflər, əsas istiqamətlər və prioritetlər müzakirə edilmiş, aparılan islahatlardan danışılmışdır. Bundan başqa Azərbaycan Respublikasının müdafiə sənayesinin potensialı və başqa məsələlər haqqında hesabat və müzakirələr dinlənilmişdir.
Toplantı avqustun 5-dək davam edəcəkdir.